Sukcesa Ekumena Esperanto-Kongreso en Rimini

Je la 07.09.2003 nia familio revenis de la 16a Ekumena Esperanto-Kongreso en Rimini (30.08.-06.09.2003), kun ĉirkaŭ 300 partoprenantoj eble la plej granda Ekumena Esperanto-Kongreso ĝis nun. Ni bone vojaĝis tien kaj reen preskaŭ senpage per Ryanair-flugo. (Kvankam ni teorie preferas trajnvojaĝojn, ni ne povis rezisti al flugbiletoj de Hahn al Forli por 20 EŬR, kaj do aĉetis ilin jam antaŭ duona jaro.)

La kongreso okazis en la paroĥejo de la esperantista pastro Duilio Magnani, kiu ornamis sian preĝejon per belegaj, daŭre ampleksigataj mozaikoj kun esperantlingvaj tekstoj. La dua avantaĝo de tiu paroĥejo estas ĝia situo nur kelkcent metrojn for de mondfama plaĝo, kie la kongresanoj povis bani sin en la ankoraŭ varma akvo de la Adriatiko dum la preskaŭ ĉiam tre agrabla somerfina vetero.

Ankaŭ ĉirkaŭ 50 gejunuloj (plejparte el Ĉeĥio, Pollando, Rumanio kaj Hungario) partoprenis la aranĝon kaj loĝis kune en hotelo vidalvide de la kongresejo. Plejparte ili estis komencantoj, kiuj vigle partoprenis en tri internaciaj konversaciaj kursoj.

La programo plejparte tre bone sukcesis. Okazis ekskursoj al San Marino kaj Ravenna (dum ideala vetero) kaj multaj prelegoj kaj diskutrondoj, el kiuj mi bedaŭrinde (kiel gvidanto de lingvokurso kaj patro de 13-monata filineto) povis ĉeesti nur malmultajn; sed vere interesa estis ekzemple diskuto kun la juna seminariano Louis Mbella el Kamerunio pri disvastigo de Esperanto kaj bonfara agado en Afriko.

Ĝojiga estis la multnombra partopreno en la elektoj de la nova IKUE-estraro; mi aŭdis ion pri 300-400 voĉdonintaj membroj (inkluzive de la poŝtaj voĉoj senditaj antaŭ la kongresoj). Elektiĝis kiel nova prezidanto de IKUE Miloslav Ŝvaĉek el Ĉeĥio; vicprezidantoj fariĝis Marija Beloŝeviĉ el Kroatio kaj pastro Lajos Kobor el Hungario.

***

En 2004 ne okazos Ekumena Kongreso, sed IKUE-Kongreso en Kretinga en Litovio (apud la Balta Maro, 3.-10.07.2004) kaj krome KELI-kongreso en Ĉeĥio (proksime al Brno?).

Por 2005 KCE invitis al Ekumena Esperanto-Kongreso en La-Chaux-de-Fonds.
Certe la invitintoj, por kiuj parolis Perla Martinelli, celas per tio proksimigi la du asociojn IKUE kaj KELI al la Pakto de la Esperanta
Civito, do al asocio certagrade konkurenca al UEA. Ne estas tute klare, ĉu IKUE kaj KELI akceptos la proponon; tamen laŭ mi indas elprovi la kunlaboron.

Ulrich Matthias

**************************************************
Ulrich Matthias, Rückertstr. 6, D-65187 Wiesbaden
Tel. +49-611-466712; <Ulrich.Matthias@t-online.de>
http://Ulrich.Matthias.bei.t-online.de
**************************************************