Medalo de Toleremo
de: "Eventoj-Budapeŝto"
Fondaĵo Zamenhof en Bialystok, Pollando en 1999 decidis krei specialan medalon
por honorigi homojn, kiu estas perceptataj kiel ege toleremaj kaj donantaj
bonan ekzemplon por la tuta mondo. La medalon projektis Dymitr
Grozdew bulgara pentristo, longjara loĝanto de Bjalistoko.
La unua medalo estis aljuĝita al la papo Johano Paŭlo la 2-a en 1999. Post tiu
evento ĉiujare la Kapitulo de la Medalo diskutadis pri alia kandidato, tamen ne
trovante iun sufiĉe meritan kaj akcepteblan de ĉiuj diskutantoj. Finfine ĉi-jare
oni interkonsentis elekti du kandidatojn: profesoron Wladyslaw Bartoŝewski, la
eksministron pri eksterlandaj rilatoj, "la polan simbolon de dialogo" precipe
inter poloj, germanoj kaj hebreoj kaj Mondan Skoltan Organizon en Ĝenevo pro
la edukado de junularo.
La enmanigo okazis la 9-an de junio ĉe la Supera Altlernejo pri Publika
Administrado. En la plenplena lerneja salonego observis rektoroj kaj profesoroj
de bjalistokaj altlernejoj, reprezentantoj de diversaj decidpovaj instancoj,
kulturorganizaĵoj, studentoj, esperantistoj, gastoj. Gazetoj delegis siajn
spertajn ĵurnalistojn, diversaj televidstacioj siajn kameraistajn teamojn.
Kompreneble, dum la restado en Bjalistoko, ne mankis tempo por meti frumatene
florojn kune kun esperantistoj apud la monumento de Ludoviko Zamenhof. La
solenaĵon i.a. partoprenis la reprezentanto de UEA Povilas Jegorovas kaj la
vicprezidanto de PEA Eduardo Kozyra kun akompanantaj malborkanoj kaj pelplinanoj.
Jaroslav Parzyszek - la prezidanto de Fondaĵo Zamenhof, intervjuita per la
redaktoro de "Gazeta Wyborĉa" diris: "Sciante, kiel malfacile estas elekti la
komunan ekzemplon de toleremo por venontaj generacioj mi estas certa, ke tiuj 19
medaloj, kiuj restis en nia deponaĵo, sufiĉos ĝis la fino de mia agado en
Esperantujo".
---
fonto: "Ret-Info"
http://www.eventoj.hu
------------------------------------
Renato Corsetti, Via del Castello, 1
IT-00036 Palestrina, Italujo
-------------------------------------