Esperanto-pavimŝtono en Wiesbaden
Esperanto-pavimŝtono en Wiesbaden
- kaj 2a Visbadena Esperanto-Tago, 22a de majo 2005
Ekde la 22an de aprilo 2005 la vorto "Esperanto" estas legebla sur la plej
centra placo de Wiesbaden. Sur la Kastela Placo "Schlossplatz", inter la
urbodomo kaj la heslanda parlamento, nun trovigĝas pavimŝtono kun la surskribo
ESPERANTO
Gruppe
Wiesbaden
La urbo Wiesbaden ofertis tiajn ŝtonojn kadre de kampanjo "Ŝtono por eterno"
kontraŭ donaco por la plibeligo de la urbo al asocioj kaj privatuloj por 1.000
EŬR (kaj al firmaoj por 2.500 EŬR). Malgraŭ la ne tute malalta kosto kelkaj
grupanoj fervore subtenis la ideon, kaj neniu ĝin kontraŭis. Kaj bonŝance ni
reagis sufiĉe frue - la urbo vere sukcesis vendi ĉiujn 2 x 70 = 140 ŝtonojn. Ili
nun troviĝas ĉirkaŭ du malnovaj kandelabroj, inter kies mezo videblas bela
mozaiko.
Hodiaŭ, kiam oni metis la ŝtonojn ĉirkaŭ la duan kandelabron, pluraj centoj da
homoj rigardis ilin (tiel ke certe cento da homoj legis ankaŭ la vorton
"Esperanto"). Poste, en normalaj tagoj, eble nur manpleno da homoj legos tiun
vorton; tian supozon mi havas pro la sŝonoj ĉirkaŭ la unua kandelabro, kiujn oni
metis tien jam pasintjare. Sed, ĉar la urbo intencas lasi la ŝtonojn tie "por
eterno", la investo eble tamen valoris la monon.
++++++++++++++++++++++++++++++++
La 22an de majo (la dimanĉon post pentekosto) vi havos la okazon rigardi la
urbon Wiesbaden - kaj la ŝtonon - en grupo de kelkdek esperantistoj, kadre de la
2a Visbadena Esperanto-Tago. Por la unua parto (kunveno ĉe nia familio kun
prelegetoj kaj ĉina tagmanĝo) jam anoncis sin preskaŭ 20 homoj, tiel ke ĝi estas
pli-malpli plena; sed eblas tamen ankoraŭ anonci sian intersiĝon.
Por la dua parto - migrado de la bela antikva urboparto
Sonnenberg al la centro de Wiesbaden - ni bonŝance povas akcepti senlime multajn
homojn. Oni iros plejparte tra belaj parkoj (kun pluraj infanludejoj, do tre
taŭga por familioj) kaj fine - post 4 km - atingos la centron, kie mi prezentos
esperantlingve la vindindaĵojn (kuracdomon "Kurhaus", varmegajn fontojn, romian
pordegon ktp.). La aranĝo estas senpaga; pliaj informoj troviĝas en germana
lingvo ĉe
http://www.esperanto.de/wiesbaden
Kompreneble ankaŭ al niaj aliaj kunvenoj en Wiesbaden vi estas ĉiam bonvenaj. Al
la monataj kunvenoj en kafejo en la sudokcidenta urbocentro ĉi-jare venis
averaĝe 9 homoj, dum ĉe la lasta Esperanto-kunveno ĉe nia familio 18 homoj
premiĝis en nian loĝoĉambron.
Ulrich Matthias
http://www.esperanto.de/wiesbaden