61-a Internacia Junulara Kongreso 31.07 – 7.08.2005 en la pola urbo Zakopane
Jam 302 personoj el 38 landoj aliĝis
al Internacia Junulara Kongreso 2005. Se vi aliĝos frue estos pli bone por vi
-post 1 majo aŭ surloke oni devos pagi malrabaton de 15 eŭroj. Zakopane – la
kongresurbo - estas tre populara loko ĉe turistoj kaj ĝi troviĝas sude de
Pollando, en Tatroj-montaro. Poloj, certe prave, nomas ĝin „la vintra ĉefurbo
de Pollando”. Sportemuloj povas tie skii, sledi, neĝtabuli. Tamen la organizantoj
de IJK diras pli: „Zakopane: vintra ĉefurbo de Pollando - somera ĉefurbo de
Esperanto”.
La kongresa temo estas „Unueco en diverseco”. Ni montros al vi kelkajn aspektojn
de egalrajteco: minoritata, lingva, religia kaj handikapula. Tre gravas, ke ni
organizos la kultur-lingvan festivalon en urba parko, do povos ĝin viziti ĉiuj
dezirantoj el Zakopane.
Krom tio ni jam certas, ke okazos inter aliaj: seminario poj junaj instruistoj
de Esperanto „Flugiloj de malfacila vento”, kursoj de Tai Ji Tsu, de la pola
lingvo kaj de la surdmutula gestlingvo, koncerto de JoMo.
Dum IJK okazos ankaŭ ekskursoj. Vi havos kelkajn eblojn. La unua estas la salminejo
Vjeliĉka (Wieliczka), kiun cetere vizitis Ludoviko Zamenhof dum UK en Krakovo en
1912. La dua estas la iama hitlera koncentrejo Auschwitz – Birkenau. En tiu ĉi
loko dum la dua mondmilito estis mortigita pli ol miliono da homoj, antaŭ ĉio
judoj. En 1979 la papo Johano Paŭlo II, preĝis tie por
observado de la homaj rajtoj en la mondo. La lasta, tria eblo estas tuttage
promeni tra Nacia Parko de Tatroj-montaro. Se vi havos bonŝancon, vi renkontos
tie lokajn bestojn: ŝafojn, marmotojn, ursojn kaj ĉamojn.
Oportuna estas ankaŭ la dato! Kiu volas pasigi la tutan feriadon kun Esperanto,
tiu havas nekredeblan ŝancon – oni povas unue partopreni UK-n en Vilno, poste
veturi al Zakopane kaj finfine viziti IJS-n en Hungario.
Tio estas absolute unika ŝanco, des pli ke ankaŭ interloka vojaĝado estas
facila!
La alta protektanto de la kongreso konsentis esti la prezidento de Pollando
Aleksander Kwaśniewski.
Ni invitas vin al Zakopane de 31. julio ĝis 7. aŭgusto 2005. Pliajn informojn vi
trovos en la ttt-ejo
www.tejo.org/ijk.