Dufoje Bulonjo en Libera Folio
Kortuŝa sukceso en Bulonjo
En aŭgusto 1905 en la nordfranca marborda urbo Boulogne-sur-Mer kolektiĝis
preskaŭ 700 esperantistoj. Antaŭ la kongreso multaj ankoraŭ dubis, ĉu
diverslandanoj efektive sukcesos interkompreniĝi per la stranga lingvo. De tiam
Universalaj Kongresoj okazadis ĉiujare, kiam ne malhelpis mondmilitoj. En 2005
Pli ol 500 homoj el 23 landoj kolektiĝis samurbe por festi la centjaran jubileon
de esperantistaj kongresoj.
"La plej kortuŝa programero al mi kaj multaj aliaj estis la malfermo en la sama
teatro, kie, antaŭ cent jaroj, parolis Zamenhof. Nun aktoro Arno Lagrange
parkere ripetis lian faman paroladon", rakontas Raita Pyhälä kiu verkis raporton
por Libera Folio.
"Oni marŝis, malantaŭ uniformita muzikistaro, al la Placo Zamenhof.
Alparolo, florkron-metado, aŭskultado al du himnoj... oni malgraŭ la
malgrandeco de la placo, fakte parkejo antaŭ urbokvartala stacidometo, ne povis
esti kaptita de la pompo aŭ soleneco de la momento", rakontas Ziko M. Sikosek,
kiu prelegis en antaŭkongresa simpozio.
***
Femina - mikspoto kun civita stampo
En marto aperis la unua numero de Femina, revuo kiun laŭdire posedas Feminisma
Esperanta Movado kaj eldonas LF-koop. La ĉefredaktoro Agneta Emanuelsson nenion
verkis en la unua numero, kaj al peto de Libera Folio pri recenz-ekzemplero
respondis, ke ŝi ne havas ekzempleron. Male ol la ĉefredaktoro, nia aŭtoro
Cecilia Gülich sukcesis ricevi ekzempleron. Laŭ ŝi temas pri miksaĵo de iuj
interesaj artikoloj kaj aliaj, stampitaj de civita retoriko aŭ simple enhave kaj
intelekte malaltnivelaj kaj apenaŭ feminismaj.
***
La Centra Oficejo de UEA ne translokiĝos
La unuan de aprilo Libera Folio rakontis, ke la CO de UEA translokiĝos al
Samarkando. Ĉiuj citaĵoj en la artikolo estas aŭtentikaj, sed la novaĵo validis
nur en la tago de la publikigo. En Danio unu el la ĉefaj tagaj ĵurnaloj,
Berlingske Tidende, en la unua de aprilo rakontis ke tute ne pasis 200 jaroj de
la naskiĝo la verkisto H.C. Andersen, sed nur 199 jaroj, tion montris novaj
esploroj. Kaj la ĉefa novaĵ-elsendo de la rusia televido rakontis, ke la turo
Big Ben en Londono devos esti rekonstruita en la formo de la cifero 1, ĉar
alikaze ĝi falos. Same surprizajn novaĵojn oni denove povos legi post unu jaro.
***
Legu pli en Libera Folio! Pli ol 14.000 vizitoj dum marto!
http://www.liberafolio.org