Raporto pri BAVELO-Seminario de 8a-10a
de oktobro 2004
Modela kunlaboro en
Baden-Virtembergo:
Francoj kaj germanoj, junuloj ka plenkreskuloj en komuna semajnfino sur
kastelo Teck
La Esperanto-organizoj de France-Est kaj Baden-Württemberg eluzas sian
najbarecon por komune "seminarii" respektive "staĝi" unufoje po jaro.
La kastelo Teck ĉe Kirchheim/Teck de la 8a ĝis la 10a de oktobro gastigis
kvindekon da lernemuloj de ok- ĝis 68 jaraĝaj. Libroservis Jean Luc Thibias, la
prezidanto de France-Est. Kvin diversaj kursoj kontentigis la diversajn bezonojn
de la partoprenantoj.Atentindas nepre la modela kunlaboro de la generacioj en
tiu aranĝo: GEJ kune seminariis kun GEA. Iniciatis la kunan entreprenon la landa
sekcio de GEJ en Baden-Württemberg, "BAVELido". Volonte akceptis BAVELO, la
landa sekcio de GEA.
La komunan agadon de la generacioj kompletigis infankurso sur Teck, gvidita de
Renate Steinke, instruistino en elementa lernejo, kune kun Alois Eder.
Partoprenis 5 infanoj pli malpli dekjaraj. Kromaj du 15jaruloj partoprenis en la
kursoj por plenkreskuloj.
La junularo havis parte siajn proprajn programerojn, kaj ankaŭ uzis la
ofertitajn kursojn laŭinterese. Bone fruktis evidente la kunlaboro: riĉis la
programo, samtempe la junuloj ĝuis la kuneston inter samaĝuloj.
En la "bukeda kurso", tiel nomita ĉar ĝi estas bunta bukedo da diversaj temoj,
prelegis la heso Andreas Emmerich, GEA-prezidanto, la bavaro Michael Scherm,
same prezidanto, sed de la "Asocio de Germanaj Esperanto-instruistoj" (AGEI) kaj
Manfred Westermeyer el Gundelfingen ĉe Freiburg.
Andreas klarigis bazajn sciojn el ekonomiko kaj aplikis ilin al la kampo
esperantomovado.
Michael malŝlosis al siaj aŭskultantoj la komprenon de la en Germanio nekonata,
sed en Ĉeĥio fama satira poemo "La bapto de Caro Vladimir" de Karel Havliĉek
Borovsky, pionira ĉeĥa ĵurnalisto.
Manfred traktis ekologiajn problemojn ekzemple de la Danuba Delto, montrante ke
la diversaj interesoj de najbaraj ŝtatoj endanĝerigas la teneran ekologian
ekvilibron de tiu regiono, kie vivas multegaj maloftaj specioj de plantoj kaj
bestoj endanĝerigitaj.
La brazilano Edmilson Lima Serejo kaj la franco André Grossmann gvidis
progresigajn kursojn, la unua sur baza, la dua sur pli alta lernnivelo.
Konversacia kapablo estis unuaranga celo de ambaŭ. .
En la adiaŭa asembleo la infanoj prezentis sin, siajn dialogo- pupojn kaj du
lernitajn kantojn je granda ĝojo de ĉiuj.
Alois Eder
Haveblas ankaŭ kelkaj fotoj je la
kutima loko
http://www.aliaflanko.de/foto
Ĝis volonta revido en similaj aranĝoj,
Robert Bogenschneider