Mallonga raporto pri la publika diskuto la 22.06.2007 en Berlin
Kiel konate vendrede, la 22an de junio, okazis publika diskuto ĉe Eŭropo-Unio, duonŝtata iniciativo por Eŭropo, en Berlin.
Temis pri la estonta solvo de la
komunikada problemo en la Eŭropaj instancoj kaj inter la civitanoj.
La organizantoj estis invitintaj min kiel prezidanton de Germana
Esperanto-Asocio por ke mi klarigu la pozicion de la
Esperantistoj, krome la ĉef-ekonomiiston de Deutsche
Bank,
prof. d-ro Norbert Walter, por la pozicio "Ni ĉiuj parolu
nur la Anglan", kaj s-ron Jochen Richter, la "dekstra
mano" de Leonard Orban, EU-komisiito por plurlingveco.
En la publiko estis multaj politikistoj kaj aliaj funkciuloj de
entreprenoj,klerigaj instancoj, ambasadejoj (Britujo,
Italujo, Slovakujo), de la Eŭropa Komisiono, ktp., entute
ĉ. 150 personoj.
Bedaŭrinde la televido ne venis kvankam antaŭanoncite. Sed oni produktis
privatan filmon, kiu aperu en Interreto.
Por resumi la diskuton el mia vidpunkto: Ne estis vera rekta diskuto, ĉar la
gvidanto demandis la tri partoprenantojn; min tro malofte,
komentis poste la ĉ. 15 Esperantistoj,
kiuj ĉeestis. Tamen mi povis komuniki multajn gravajn informojn pri Esperanto
kaj pri niaj imagoj, kiel enkonduki kaj apliki ĝin.
Estis rimarkeble, ke oni respektis min kiel fakulon. Neniu kuraĝis, ataki per
la kutimaj antaŭjuĝoj la lingvajn kvalifikojn de Esperanto. Des pli, ĉar
s-ro Richter atentigis, ke altnivelan Anglan
(do la Britan aŭ la Usonan) la plej multaj
Eŭropaj funkciuloj simple ne komprenas, tiel ke oni interkomunikadas per
(senkultura) ĵargono.
La voĉdonadoj estis fuŝaj, kiel mi dekomence atentigis, ĉar la tri ebloj
("nur la Angla", "nur Esperanto", "ĉiuj lingvoj") estis malbone
formulitaj. Tamen relative multaj ĉeestantoj voĉdonis por
Esperanto, iom pli multaj por la Angla, sed la plejmulto
por la aplikado de ĉiuj lingvoj, kion Esperanto ja tute ne
malhelpu.
La tuta aranĝo resumeblas jene:
- De la politikistoj ni atendu nenion, ĉar ili vivas en aparta mondo.
- Multaj gravuloj povis konstati en Berlin, ke Esperanto pluekzistas.
- Seriozaj homoj (mi povis nomi prof. d-ron Reinhard Selten) pledas por
Esperanto.
- Ne ekzistas lingvaj argumentoj kontraŭ Esperanto, baras ĝian aplikon nur
politikaj kaŭzoj.
- Espereble multaj notis, ke valoras, pluatenti la estontan evoluon de la lingva
situacio en Eŭropo.
Post la aranĝo estis ankoraŭ viglaj diskutoj. Mi mem i.a. parolis longe kun
delegito de la Brita ambasadejo, kiun mi povis konvinki
pri la specifa propedeŭtika valoro de Esperanto.
Mi kompreneble rekomendis al li la Britan projekton "springboard".
Eĉ se iu konkreta rezulto, kiel atendeble, ne estis videbla: Estus ja ne
imageble, malakcepti tian inviton kaj neglekti tian eblon
prezenti Esperanton kaj ĝiajn eblojn en seriozaj
kadro kaj maniero. Almenaŭ tion mi atingis, laŭ la eĥo de la ĉeestantaj Esperantistoj, kiuj uzis la okzon, disdoni iom da materialo kaj paroli kun laŭeble multaj aliaj homoj.
Al ili mi esprimas jen mian koran dankon pro tiu solidareca helpo.
Karaj samideanoj,
ne maltrafu la okazon, per komentoj en jen ablogo subteni nian aferon:
http://www.menschen-bilden-europa.de/5683.html?&tx_ttnews%5Btt_news%5D=1195&tx_ttnews%5BbackPid%5D=5459&cHash=9ea3652b3f
Rudolf Fischer, prezidanto de Germana Esperanto-Asocio