Litova stelo Nr.1
Ĵus aperis la unua ĉi-jara numero de
dumonata revuo de Litova Esperanto-Asocio "Litova stelo". Ĝi estas kiel kutime
36-paĝa.Ĝi komenciĝas per koncizigita raporto pri la agado dum 2003 de Estraro
de Litova Esperanto-Asocio por la 39-a kongreso de Litova Esperanto-Asocio,
okazinta la 13-an de Decembro, 2003 en Kaunas.Poste sekvas informo pri la
kongreso mem kaj nova Estraro de Litova Esperanto-Asocio. Sekvas mallonga
informo pri Zamenhof-tagoj-2003 kaj pri "Eŭropa bunto". Antanas GRINCEVICIUS
daŭrigas mozaikon de Litovia vivo.Finno Jorma AHOMAKI prezentas siajn impresojn
pri la vojaĝo al Litovio fine de la 2003 kaj komence de 2004. Laurynas SKUPAS
rakontas pri sia vojaĝo al Japanio komence de Decembro, 2003. Estas publikigitaj
kelkaj versoj el nova poezia libro de Gediminas DEGESYS "Momento de malkovro".
Aida CIZIKAITE prezentas lokojn en Litovio, kiujn vizitos partoprenantoj de la
57-a kongreso de IKUE en Kretinga, Litovio komence de Julio ĉi-jare post la
kongreso.Estas multe da informoj pri la 40-aj jubileaj Baltiaj Esperanto-Tagoj,
kiuj ĉijare la 10-18-an de Julio okazos en banurbo BIRSTONAS. Vilniusano
Algimantas PILIPONIS surbaze de informoj pri la tutlanda censo en Litovio en
2001 prezentas donitaĵojn pri la oficiale registritaj scipovantoj de Esperanto.
Kvin paĝoj de la revunumero estas dediĉitaj al aktualaj informoj pri la
esperantista agado en Litovio kaj en aliaj landoj sub komuna rubriko "En la
mondo Esperanta". Estas du distraj paĝoj.La artikoloj estas ilustritaj per
multaj fotoj, kiuj pro shanĝo de presejo ekde ĉi-jaro estas multe pli bonkvalite
presitaj. La numero estas jam dissendita al la abonantoj.
Kiuj ankoraŭ ne reabonis tiun-ĉi interesan revuon plene en Esperanto por 2004
rapidu tion fari. Novaj abonantoj estas ankaŭ ege atendataj. "Litovan stelon"
oni povas aboni pere de perantoj, kiuj nun estas en 17 landoj (Belgio, Belorusio,
Britio, Ĉeĥio, Danio, Estonio, Francio, Germanio, Hispanio, Italio, Latvio,
Makedonio, Nederlando, Pollando, Rusio, Svedio, Usono), aŭ pere de Libroservo de
UEA. Perantoj en aliaj landoj estas serĉataj. Oni povas sin turni rekte ankaŭ al
redakcio de la revuo. Ĝenerala abonprezo estas 14 eŭroj jare. Ekssocialismaj
eŭropaj landoj kaj ekssovetiaj landoj havas konsiderindan rabaton.Pri ĉiuj
demandoj informiĝu detale laŭ retadreso litovastelo@takas.lt . Nun la revuo
estas presata en 600 ekz. Ĝia redaktoro estas konata litova esperantisto Honora
Membro de UEA Petras CELIAUSKAS. "Litova stelo" en ĉiu numero publikigas
aktualajn informojn prepare al la 90-a UK en Vilnius en 2005. Ĝi helpos al Vi
konatiĝi kun ankoraŭ vaste nekonata lando. La revuo aperas tre regule, ĝi havas
plenkoloran kovrilon. Ĝi publikigas ne nur informojn pri Litovio, ĝia historio,
kulturo, sed ankaŭ pri lingvaj demandoj, Esperanto-movado kaj ĝia historio.
Parto de la revuo ĉiam estas dediĉita al belarta literaturo en Esperanto -
originala kaj tradukita.
Povilas JEGOROVAS